🍊 *संत्रा बागेत मृग बहार न येण्याची कारणे* 🍊

🌳 *माझा भूमिरक्षक* 🌳

🍊 *संत्रा बागेत मृग बहार न येण्याची कारणे* 🍊

बागेला ताणाचा कालावधी जमिनीचा मगदूर, झाडाचे वय आणि तापमानावर अवलंबून असतो. मृग बहारासाठी भारी जमिनीत योग्य ताण बसत नाही. याचा परिणाम मृग बहाराची फुले न येण्यावर होतो.

_* 📚
👇🏻👇🏻👇🏻👇🏻👇🏻👇🏻👇🏻



*अयोग्य जमिनीमध्ये केलेली लागवड-*
१) विदर्भातील ४० टक्के संत्रा बागा भारी जमिनीमध्ये लावलेल्या आहेत. या जमिनीमध्ये चिकणमातीचे प्रमाण ६० टक्क्यांपेक्षा जास्त आहे. पाण्याचा निचरा योग्य प्रमाणात होत नाही, तसेच चुनखडीचे प्रमाण १० टक्क्यांपेक्षा जास्त आहे.
२) मृग बहारासाठी भारी जमिनीत योग्य ताण बसत नाही. याचा परिणाम मृग बहाराची फुले न येण्यावर होतो, तसेच चुनखडीचे प्रमाण १० टक्क्यांपेक्षा जास्त असल्यामुळे संत्रा झाडाला देण्यात येणारी अन्नद्रव्ये वेळेत उपलब्ध होत नाहीत. याचा परिणाम बहार येण्याकरिता कर्ब/नत्र यांचे प्रमाण होत नाही. याचा मृग बहर न येण्यावर परिणाम होतो.

*हवामानाचा परिणाम-*
१) मृग बहर येण्याकरिता पर्जन्यमान, हवेतील ओलावा आणि तापमान हे योग्य प्रमाणात असणे जरूरी आहे.
२) जूनचा तिसरा आठवडा ते जुलैचा दुसरा आठवडा या कालावधीत संत्रा बागेच्या जमिनीमध्ये ओलावा आवश्यक आहे. या कालावधीत ढगाळ वातावरण राहून ५ ते ६ दिवसांची पावसाची झड असावी लागते. हवेतील ओलावा ८० ते ९० टक्के असावा लागतो आणि सरासरी तापमान २७ ते २९ अंश सेल्सिअस असणे आवश्यक आहे. याप्रमाणे जर पाऊस, हवेतील आर्द्रता आणि तापमान या कालावधीत असेल तर मृग बहर येतो. या काळात ओलीताची सोय असणे अतिशय महत्त्वाची असते. नसल्यास त्याचा संत्रा मृग बहरावर प्रतिकूल परिणाम होतो.



*झाडाला देण्यात येणारा अयोग्य ताण-*
१) मृग बहाराची फुले येण्याकरिता संत्रा झाडाला उन्हाळ्यात पाण्याचा ताण द्यावा लागतो. ताणाचा कालावधी जमिनीचा मगदूर, झाडाचे वय आणि तापमानावर अवलंबून असतो. हा ताण उन्हाळ्यात अवकाळी पाऊस आल्यामुळे बसत नाही, त्यामुळे मृग बहराची फुले येत नाहीत.
२) योग्य ताण बसलेल्या झाडाची पाने कोमेजतात, सुकत खालच्या बाजूने वाकतात. काही प्रमाणात पानाची गळ होते. हा माफक ताण भारी जमिनीत लागवड केलेल्या संत्रा झाडांना बसत नाही, त्यामुळेसुद्धा मृग बहर येत नाही.
३) पानामध्ये ८० टक्क्यांपेक्षा जास्त पाण्याचे प्रमाण असल्यास झाडाला योग्य ताण बसत नाही, तर ७० टक्क्यांपेक्षा कमी असल्यास तीव्र ताण बसलेला असतो.

*झाडाचे खालावलेले प्रकृतीमान-*
१) संत्रा बागेपासून उत्पादन मिळत नसल्यामुळे काही बागायतदार बागेची योग्य निगा राखत नाहीत. त्या बागांमध्ये मशागतीचा अभाव आढळतो. उदा. सल न काढणे, पीक संरक्षणाचा अभाव, शिफारशीनुसार खत मात्रा न देणे, ओलीताचा अभाव. या कारणांमुळे संत्र्याचे झाड कमजोर होऊन अशक्त होते, अशा झाडावर बहर येत नाही. त्याचा अपेक्षित उत्पादनावर परिणाम होतो.
२) भारी जमिनीचा पोत सुधारण्यासाठी दरवर्षी भरपूर सेंद्रिय खताचा वापर करावा. दरवर्षी प्रत्येक संत्रा झाडाला ४० ते ५० किलो शेणखत आणि ७.५ किलो निंबोळी ढेप द्यावी. संत्रा बागेत बोरूसारख्या हिरवळीच्या पिकांची लागवड करावी. हिरवळीचे पीक फुले येण्यापूर्वी गाडावे.
३) बागेत पावसाच्या पाण्याचा निचरा होण्याकरिता उताराच्या दिशेने दोन झाडांमध्ये चर खोदून पाणी बागेच्या बाहेर काढावे.